Testamentêre regte is magte wat in terme van die Trustakte toegeken word aan die Skenker of aan ‘n spesifieke Trustee wat die Skenker of Trustee by magte plaas om in sy/haar testament die volgende, afhangende van die regte wat toegeken is in die Trustakte, te bepaal:

1. Die formule vir die verdeling van die bates en inkomste van die Trust aan die begunstigdes. Die Skenker of Trustee wat testamentêre magte in terme van die Trustakte het, het dus dan die magte om in sy/haar testament te bepaal in watter verhouding die bates en inkomste van die Trust tussen die begunstigdes verdeel moet word.
2. Wie genomineer word om as sy/haar opvolgende trustee op te tree by sy/haar afsterwe.
3. Die vestigingsdatum van die Trust.

Indien die Trustee of Skenker hierdie regte uitoefen in sy/haar testament, sal daardie bepaling voorrang geniet bo enige besluit wat reeds deur die trustees geneem is of nog geneem gaan word en sal dit geag word as die finale bepaling ten opsigte van die bevoordeling van die begunstigdes uit die Trust, die vestigingsdatum van die Trust asook wie as opvolgende Trustee aangestel gaan word in sy/haar plek.

Indien die trustee of Skenker nie hierdie regte in sy/haar testament uitoefen nie, sal die trustees geregtig wees om te bepaal hoe die bates en inkomste van die trust verdeel gaan word volgens die bepalings van die Trustakte, ‘n opvolgende trustee van hulle keuse aan te stel by die afsterwe van die Skenker of Trustee en/of om die vestigingsdatum te bepaal ooreenkomstig die bepalings van die Trustakte.

Die Skenker of Trustee aan wie hierdie magte toegeken is, mag egter nie enige van hierdie regte gebruik om sy/haar eie boedel te bevoordeel nie.  Enige poging tot bevoordeling of bevoordeling sal ab initio nietig wees.